«Наука в лицах» марафоны галимнәрне, дәүләт эшлеклеләрен һәм яшьләрне берләштерде
14 Февраля 2023
Россия фәне көненә багышланган чара "Знание" Россия җәмгыятенең тугыз төбәк студиясендә узды. Марафонда катнашучы шәһәр мәйданчыкларында барлыгы 48 спикер чыгыш ясады.
Россия Федерациясе Мәгариф министрының беренче урынбасары Александр Бугаев үз чыгышында билгеләп үткәнчә, 2022-2031 еллар Россия Президенты Владимир Путин тарафыннан фән һәм технологияләр унъеллыгы дип игълан ителде. Унъеллыкның төп бурычы – яшьләрне фән өлкәсенә җәлеп итү. Россия Мәгариф министрының беренче урынбасары белем бирүгә уникаль якын килүне эзләү мөһимлеге, фәннәрне өйрәнүдә заманча тенденцияләр турында сөйләде.
"Знание" Россия җәмгыятенең генераль директоры Максим Древаль Луганскта һәм Владикавказда "Галимнәр - мәктәпләрдә" акциясе старт алуы турында хәбәр итте. Ул Россиянең "Знание" дип аталган масштаблы проекты кысаларында уза.
"Наука в лицах" марафоны кысаларында фән һәм инновацияләр өлкәсендә Россия Президенты премиясе лауреатлары, галимнәр чыгыш ясады. Алар лекцияләр укыдылар, дискуссияләрдә катнаштылар һәм тыңлаучыларның сорауларына җавап бирделәр.
Марафонның Мәскәү мәйданчыгында чыгыш ясаучылар арасында 2022 елда яшь галимнәр өчен фән һәм инновацияләр өлкәсендә Россия Федерациясе Президенты премиясе лауреаты – техник фәннәр кандидаты, КФУның Геология һәм нефть-газ технологияләре институтының нефть бирүчәнлеген арттыру методлары фәнни-тикшеренү лабораториясенең өлкән фәнни хезмәткәре Ирек Мөхәммәтдинов дә бар.
«Наука в лицах» марафонын оештыручы – "Знание" Россия җәмгыяте. Чара Россия Федерациясе Мәгариф министрлыгы ярдәме белән үткәрелде. Проектның партнерлары – Россия Мәгариф һәм фән министрлыгы, Фәнни һәм мәгариф өлкәләрендә яшьләр эшләре буенча координация советы һәм "Милли өстенлекләр" АКБО.