Институт хезмәткәрләре М.Акмулланың 190 еллыгына багышланган конференциядә катнаштылар
17.12.2021
Г. Ибраһимов исем. Тел, әдәбият һәм сәнгать институтының әдәбият белеме бүлеге мөдире, филология фәннәре докторы Әлфәт Закирҗанов һәм шушы ук бүлекнең фәнни хезмәткәре, филология фәннәре докторы Венера Макарова «Мифтахетдин Акмулла һәм шул чорның тарихи мирасы – мөмкинлекләр һәм перспективалар» дип аталган Төбәкара фәнни конференциядә катнаштылар.
Төрки әдәбиятның иң күренекле вәкилләреннән булган Акмулла – татар, башкорт, казакъ әдәбиятлары һәм сәнгате үсешенә зур йогынты ясаган шәхес. Әлфәт Закирҗанов үзенең «М. Акмулланың иҗади мирасы һәм хәзерге чор» дип аталган докладында, танылган мәгърифәтче Акмулла бүген дә, буыннан-буынга күчеп, халык хәтерендә яши дип билгеләп үтте. Галим фикеренчә, аның азатлык сөюче халкының рухын һәм фикерләрен чагылдырган иҗаты безнең көннәрдә дә актуаль.
Венера Макарованың чыгышы Акмулла иҗатында көлү эстетикасының үзенчәлеген һәм тулаем татар сатирик әдәбиятын үстерүдә аның әһәмиятен күрсәтүгә багышланган иде.
Чара 14 декабрьдә – Акмулланың туган көнендә – Чиләбе өлкәсенең Миасс шәһәрендә узды. Шагыйрь әлеге шәһәрнең мөселман зиратында җирләнгән.