Туган телләрне укыту мәсьәләләре буенча вебинар
16.12.2022
Г. Ибраһимов исемендәге Тел, әдәбият һәм сәнгать институтының милли мәгариф бүлеге мөдире, филология фәннәре кандидаты Гөлназ Мөхәрләмова һәм шул ук бүлекнең әйдәп баручы фәнни хезмәткәре, филология фәннәре кандидаты, доцент Лилия Гыйниятуллина 2022 елның 15 декабрендә Россия Федерациясе халыкларының туган телләр институты тарафыннан үткәрелгән вебинарда катнаштылар. Чара туган тел дәресләрендә кулланылучы методик комплектларда (УМК) төбәк һәм этномәдәни үзенчәлекләрнең чагылышына багышланган иде.
Вебинарда методик комплектларны туган телләр һәм әдәбиятларны укытуда куллану, аларда төбәк һәм этномәдәни үзенчәлекләрнең чагылышы, бу юнәлештә эшләүче Пермь крае, Адыгея, Марий Эл, Татарстан республикалары педагогик һәм фәнни хезмәткәрләренең эш тәҗрибәсен яктырту мәсьәләләре каралды.
Лилия Гыйниятуллина үз чыгышында катнашучыларны туган (татар) теленнән УМК ярдәмендә этномәдәни компетенция формалаштыру мөмкинлеге белән таныштырды, Гөлназ Мөхәрләмова ТР Фәннәр академиясе Г. Ибраһимов исем. Тел, әдәбият һәм сәнгать институты галимнәре тарафыннан эшләнгән татар әдәбияты буенча эшләнгән укыту-методик комплектларында каралган этномәдәни компонентлар турында сөйләде.