ТӘҺСИдә традицион мәдәниятне саклау һәм үстерү тәҗрибәсе турында фикер алыштылар
19.12.2022
Татарстан Республикасы Фәннәр академиясе Г. Ибраһимов исем. Тел, әдәбият һәм сәнгать институтында 2022 елның 16 декабрендә «Хәзерге дөньяда традицион мәдәниятне саклау һәм үстерү тәҗрибәсе» дип аталган I Халыкара конференция узды. Чара Сәнгать белеме үзәге тарафыннан халык сәнгатен популярлаштыру һәм мәдәни традицияләрне, тарих һәм мәдәният һәйкәлләрен, этномәдәни күптөрлелекне, барлык халыкларның мәдәни үзенчәлеген саклап калу максатыннан игълан ителгән Россия халыкларының мәдәни мирасы елы кысаларында оештырылды.
Конференциядә традицион мәдәниятнең төрле формаларындагы тарихи үзенчәлекләр, шулай ук Татарстанда, Төньяк Кавказ (Дагстан, Ингушетия) республикаларында, Кавказ арты (Азәрбайҗан, Грузия) һәм Үзәк Азия (Казакъстан, Үзбәкстан) илләрендә этномәдәниятны саклау һәм үстерү мәсьәләләре каралды.
Конференциядә катнашучылар үз чыгышларында әлеге тәҗрибәне үзләштерү милли мәдәният традицияләрен формалаштыруга, милли характерның әхлакый һәм этник нигезләрен торгызуга, традицион мәдәниятне саклау һәм үстерү өлкәсендә максатчан дәүләт сәясәтен булдыруга ярдәм итәр дигән ышаныч белдерделәр.
Конференция материаллары аерым җыентык (Опыт сохранения и развития традиционной культуры в современном мире: Материалы I Международной научной конференции. Казань, 16 декабря 2022 г. – Казань, 2022. – 168 с.: ил.) буларак дөнья күрде һәм чарада катнашучыларга җиткерелде.
