Айгөл Салихова – Дамир Сираҗиев исемендәге премия лауреаты
29.03.2023
27 март, Бөтендөнья театр көнендә, Әлмәт шәһәрендә Татарстан Республикасы Мәдәният министрлыгының «Тантана» («Триумф») театр премиясе лауреатлары игълан ителде. Быел Дамир Сираҗиев исемендәге премиягә ТР ФА Г.Ибраһимов исем. Тел, әдәбият һәм сәнгать институтының Сәнгать белеме үзәге әйдәп баручы фәнни хезмәткәре, филология фәннәре кандидаты Айгөл Салихова (Габәши) лаек булды.
Дамир Сираҗиев исемендәге премия 1999 елдан Татарстан Республикасы Мәдәният министрлыгы һәм «Җыен» татар телен һәм мәдәниятен саклау һәм үстерү фонды тарафыннан бирелә. Айгөл Салихова әлеге дәрәҗәле бүләккә күп еллык нәтиҗәле иҗади хезмәте һәм татар театр сәнгате үсешенә керткән зур өлеше өчен лаек булды. Аны чын күңелдән котлыйбыз һәм киләчәктә дә иҗади уңышлар телибез!