Россия империясе төбәкләрендә сәнгать күргәзмәләре
03.05.2023
27-28 апрельдә Санкт-Петербургта Европа университеты тарафыннан оештырылган «Вне столиц. Художественные выставки в регионах Российской империи» дип аталган Халыкара конференция узды. Аның эшендә Татарстан Фәннәр академиясе Г. Ибраһимов исем. Тел, әдәбият һәм сәнгать институтының Сәнгать белеме үзәге хезмәткәрләре дә катнашты һәм XIX гасырда Казанда оештырылган күргәзмәләр турында докладлар белән чыгыш ясады.
Сәнгать белеме кандидаты Людмила Шкляева XIX-XX гасырда Казан губернасында узган күргәзмәләренең типологиясе турында сөйләде («Выставки как импульс к развитию художественной жизни регионов Российской империи» секциясе).
Сәнгать белеме кандидаты Наталья Герасимованың доклады XIX гасырның икенче яртысында–XX гасыр башында шәхси коллекцияләрдәге сәнгать әсәрләре күргәзмәләренә; сәнгать белеме кандидаты Ольга Улемнованың чыгышы – ХХ гасыр башында Россия сәнгать берләшмәләренең Казанда оештырылган күргәзмәләренә багышланган иде.
Конференция Европа университетының Сәнгать һәм мәдәни мирас мәктәбе профессорлары һәм аспирантлары тәкъдиме белән 2021 ел ахырында эшли башлаган «Собирать и выставлять в Российской империи» проекты кысаларында оештырылды.