Филология фәннәре докторы дәрәҗәсе бирелү белән котлыйбыз

Филология фәннәре докторы дәрәҗәсе бирелү белән котлыйбыз 15.05.2023       Бүген Татарстан Республикасы Фәннәр академиясе президиумы утырышында президент Мәкъзүм Саләхов Г.Ибраһимов исем. Тел, әдәбият һәм сәнгать институтының 2022 елда ТР Фәннәр академиясе Диссертация советы каршында диссертацияләрен уңышлы яклаган хезмәткәрләренә филология фәннәре докторы гыйльми дәрәҗәсен бирү турында дипломнар тапшырды. 
     Алар арасында – ТӘҺСИ директорының фән буенча урынбасары Хисамов Олег Ришат улы, институт директорының инновацион эшчәнлек һәм тышкы элемтәләр буенча урынбасары Шәрипова Алсу Сәмигулла кызы һәм гомуми лингвистика белеме бүлегенең әйдәп баручы фәнни хезмәткәре Мирхаев Рифат Фирдинат улы. 
     Олег Хисамовның «Көнбатыш Себернең төрки-татар географик лексикасы: ареаль аспект» темасына (фәнни белгечлек 10.02.02 – Россия Федерациясе халыклары телләре (татар теле) диссертациясе 2022 елның 29 сентябрендә якланды. Алсу Шәрипованың диссертациясе темасы – «XX – XXI гасыр башы татар драматургиясе: инвариант һәм аның тарихи трансформациясе» (фәнни белгечлек 10.01.02 – Россия Федерациясе халыклары әдәбияты (татар әдәбияты). Рифат Мирхаевның филология фәннәре докторы гыйльми дәрәҗәсенә диссертациясе XIX гасырның икенче яртысы – XX гасыр башында татар телен функциональ үстерүнең социаль табигатенә багышланган (фәнни белгечлек 10.02.02 – Россия Федерациясе халыклары телләре (татар теле). 
     Хезмәттәшләребезне әлеге мөһим вакыйга белән котлыйбыз һәм аларга чын күңелдән сәламәтлек, алга таба да фәнни уңышлар һәм һөнәри казанышлар телибез!

    

Возврат к списку