Традицион сәнгать кәсепләренә багышланган II Халыкара форум
10.07.2023
ТР Фәннәр академиясе Г.Ибраһимов исем. Тел, әдәбият һәм сәнгать институтының Сәнгать белеме үзәге мөдире, сәнгать белеме докторы Рауза Солтанова һәм шул ук үзәкнең өлкән фәнни хезмәткәре, сәнгать белеме кандидаты Людмила Шкляева Санкт-Петербург шәһәрендә традицион сәнгать кәсепләренә багашланган халыкара форум эшендә катнаштылар.
Чара Санкт-Петербург шәһәренең халык сәнгате югары мәктәбе (академиясе) тарафыннан оештырылган иде. Форум кысаларында Казан инновацион университеты студентлары белән берлектә «Киез Нур» лабораториясендә әзерләнгән киез һәм ефәктән эшләнгән татар стилле заманча костюмнар тәкъдим ителде. Людмила Шкляева мәдәни мирасны саклау һәм үстерү тәҗрибәсе буларак эшләп килүче әлеге проект турында доклад белән чыгыш ясады.
Татарстан сәнгать белгечләре шулай ук киез басу буенча мастер-класс үткәрделәр, аның барышында чарада катнашучылар белән бергә әлеге техникада «Су анасы букеты» панносын эшләделәр.
