«Тукай Санкт-Петербургта» арт-пленэры
12.07.2023
20-30 июнь көннәрендә Санкт-Петербургта сәнгать белеме докторы, Г. Ибраһимов исем. Тел, әдәбият һәм сәнгать институты Сәнгать белеме үзәге мөдире Рауза Солтанова тарафыннан Россия рәссамнар берлегенең, шулай ук Сәнгать белгечләре ассоциациясенең Татарстандагы бүлекләре белән берлектә Татарстан Республикасы Мәдәният министрлыгының матди ярдәме белән оештырылган «Тукай Санкт-Петербургта» Бөтенроссия арт-пленэры узды.
«Тукай эзләре буенча» проекты кысаларында оештырылган әлеге чара бөек Тукайның Санкт-Петербургка килүенә 110 ел тулуга багышланган иде. Билгеле булганча, шагыйрь Россия империясе башкаласына 1912 елның апрелендә Муса Бигиев чакыруы буенча килә. Монда ул татар зыялылары, укучы яшьләр белән очраша. Санкт-Петербургта булу турындагы тәэсирләре шагыйрьнең «Мәкәләи мәхсуса»сында, шулай ук замандашларының истәлекләрендә чагыла.
«Тукай Санкт-Петербургта» арт-пленэрында Татарстанның төрле шәһәрләреннән (Казан, Яр Чаллы, Яшел Үзән), шулай ук Санкт-Петербург, Чиләбе, Мәскәүдән килгән рәссамнар катнашты. Проект кысаларында берничә чара узды. Мәсәлән, 21 июньдә Туган якны өйрәнүчеләр берлеге әгъзасы Альмира Таһирҗанова белән очрашу булды, 23 июньдә Татарстан Республикасының Санкт-Петербург шәһәрендәге һәм Ленинград өлкәсендәге даими вәкиллегендә шәһәрнең татар зыялылары һәм ТӘҺСИ галимнәре катнашында «Габдулла Тукайның сынлы сәнгатьтәге топослары» темасына түгәрәк өстәл оештырылды.
Проектта катнашучылар Санкт-Петербургның сәнгать музейларында булдылар, Югары халык сәнгате мәктәбе эшчәнлеге, әлеге мәктәп студентлары күргәзмәсе белән таныштылар, урындагы рәссамнар белән элемтәләр урнаштырдылар.
Арт-пленэр вакытында иҗат ителгән әсәрләр сентябрьдә Казанда Габдулла Тукай әдәби музеенда күрсәтеләчәк дип көтелә.
Р.Р.Солтанова фотосы.