Этномузыкология мәсьәләләренә багышланган түгәрәк өстәл
13.11.2023
2023 елның 8 ноябрендә Г. Ибраһимов исем. Тел, әдәбият һәм сәнгать институты хезмәткәрләре – Сәнгать белеме үзәге мөдире, сәнгать фәннәре докторы Р.Р. Солтанова, халык иҗаты бүлеге әйдәп баручы фәнни хезмәткәре, филология фәннәре докторы Л.Х. Дәүләтшина һәм Сәнгать белеме үзәге фәнни хезмәткәре Г.Г. Гыйлемьянова танылган этномузыколог Э.Р. Каюмова истәлегенә багышланган «Кыр этномузыкологиясенең актуаль проблемалары» дип аталган түгәрәк өстәл эшендә катнаштылар.
Чара Россия Федерациясендә педагог һәм остаз елы кысаларында Казан федераль университетының Филология һәм мәдәниятара багланышлар институтында узды. Анда күренекле фән һәм мәдәният эшлеклеләре, галимнәр, педагоглар Татарстанда этномузыкология үсеше, халык көйләрен җыю һәм өйрәнү, фольклор фондларын системалаштыру белән бәйле мәсьәләләр турында фикер алышты. ТӘҺСИ хезмәткәрләре үзләренең чыгышларында шулай ук Эльмира Каюмованың эшчәнлеге турында истәлекләре белән уртаклаштылар, галимнең хезмәтләренең бүгенге көн фәне өчен аерым кыйммәтен һәм аларны яңадан нәшер итү зарурлыгын билгеләп үттеләр.