Шәмсетдин Зәки истәлегенә
22.02.2024
21 февраль көнне филология фәннәре кандидаты, ТР ФА Г.Ибраһимов исем. Тел, әдәбият һәм сәнгать институтының Язма мирас үзәге өлкән фәнни хезмәткәре Нуридә Насыйбуллина XIX гасырның танылган шагыйре һәм педагогы, көнчыгыш фикер ияләре Ибн әл–Араби, Җәләлетдин Руми, Фаридеддин Аттар, Гәбдерәхмән Җәми традицияләрен дәвам итүчеләрнең берсе Шәмсетдин Зәки истәлегенә багышланган тантаналарда катнашты. Чара Ш.Зәкинең туган авылы Зәк-Ишмәттә (Башкортстан Республикасы Куергазы районы) узды.
Чара фасадында Шәмсетдин Зәки хөрмәтенә мемориаль такта урнаштырылган Зәк-Ишмәт урта мәктәбендә башланды. Нуридә Насыйбуллина ТӘҺСИнең Халыкара туган тел көненә багышланган «Фәнни десант» проекты кысаларында мәктәп укучылары белән очрашу үткәрде.
Мәктәп укучылары һәм укытучылар талантлы якташларының тормыш юлы турында сөйләделәр. Милли ризыклар, җирле осталарның кул эшләре күргәзмәсе оештырылган авыл клубында һәвәскәрләр катнашында концерт узды.
Чарада шулай ук филология фәннәре кандидатлары, Уфа фән һәм технологияләр университетының Стәрлетамак филиалы татар һәм чуаш филологиясе кафедрасы мөдире Илсур Мансуров, доцент Нәсимә Мөкимова, төрле иҗтимагый оешма һәм БР Куергазы районы администрациясе вәкилләре катнашты.
