Казан укучылары ТӘһСИнең яңа проектлары белән танышты
07.03.2024
Г.Ибраһимов исем. Тел, әдәбият һәм сәнгать институты Язма мирас үзәгенең әйдәп баручы хезмәткәре Азат Ахунов Казан шәһәре Вахитов районы 12 нче урта белем бирү мәктәбенең югары сыйныф укучылары белән очрашты. Чара әлеге мәктәптә 2024 елның 6 мартында Россия Фәннәр академиясенең 300 еллыгына багышлап оештырылды.
Галим Татарстанда академик гуманитар фәннең барлыкка килүе, 1939 елдан башлап ТӘһСИнең әлеге процесстагы роле турында сөйләде. Очрашуда катнашучыларны институт эшчәнлегенең төп юнәлешләре, шулай ук иң мөһим фәнни казанышлар белән таныштырып, Азат Ахунов фәнни учреждение башкара торган яңа проектлар турында хәбәр итте.
Гарәп графикасында язылган татар текстларын кириллицага күчерү эшендә IT-технологияләрне куллану, шулай ук кулъязма мирасыбызны уку өлкәсендәге эшләнмәләр белән бәйле яңа электрон проектлар турындагы мәгълүмат укучыларда аеруча зур кызыксыну уятты. Гуманитар фәннәр өлкәсендәге заманча тикшеренүләрнең дисциплинаара характерын чагылдырган башка мәсьәләләр дә күтәрелде.
Чараны оештыручылар тарафыннан мондый очрашуларны даими үткәрү теләге белдерелде.
