Башкортстан татарлары фольклоры һәм әдәбияты мирасында мәдәниятләр диалогы: татар филологиясе кафедрасының юбилярлары хөрмәтенә түгәрәк өстәл
19.05.2025
Татарстан Фәннәр академиясе Г. Ибраһимов исем. Тел, әдәбият һәм сәнгать институтының әйдәп баручы фәнни хезмәткәре, филология фәннәре докторы Венера Макарова Уфа университетында «Көнбатыш – Көнчыгыш» контекстында Башкортстан татарлары фольклоры һәм әдәби мирасы» дип аталган фәнни-методологик семинар рамкаларында уздырылган түгәрәк өстәл утырышында чыгыш ясады.
Уфа Фән һәм технологияләр университетының татар филологиясе һәм мәдәнияте кафедрасы оештырган гыйльми җыен берьюлы ике юбилейга – утыз елга якын гомерен шушы кафедрага багышлаган фольклорчы галим Илдус Фазлетдиновның 50 яшенә һәм танылган язучы, тел белгече, 1957–1960 елларда биредә эшләгән Хәсән Сарьянның тууына 95 ел тулуга багышланды.