Яңа «Әлифба» һәм киләчәк дәреслекләре: Мөслимә Шәкүрова Алабугада конференциядә катнашты
27.08.2025
2025 елның 25 августында Казан федераль университетының Алабуга филиалы базасында оештырылган «Алабуга муниципаль районы мәгърифәте: кыйммәтләр ориентирлары һәм сыйфат күрсәткечләре» конференциясе узды. Чара төрле структуралар – Татарстанның дәүләт хакимияте органнары, мәгариф учреждениеләре һәм фәнни оешмалары вәкилләренең игътибарын җәлеп итте. Төп чыгышларның берсе – ТР ФА ТӘһСИнең милли мәгариф бүлеге әйдәп баручы фәнни хезмәткәре, филология фәннәре кандидаты Мөслимә Шәкүрованыкы иде. Аның докладының темасы түбәндәгечә яңгырады: «Хәзерге “Әлифба”, туган (татар) теленә өйрәткәндә яңа буын дәреслекләре: актуальлек һәм перспективалар». Доклад татар теленең укыту материалларын модернизацияләүнең актуаль проблемаларына, укытуга яңа методика һәм алымнар булдыруга багышланган.